Ish-kryeministri Sali Berisha shprehu ngushëllimet për ndarjen nga jeta të skulptorit të njohur, Arben Bajo. Ai ndërroi jetë nga koronavirusi, ndërkohë që familja dhe miqtë e tij kishin bërë thirrje që t’i sigurohej gjak.
MESAZHI I BERISHES
Dielli nuk lindi sot për skulptorin e njohur Arben Bajo!
Të dashur miq, Covid-19 ndërpreu para kohe krijimtarinë dhe jetën e skulptorit të talentuar Arben Bajo, që luftoi për ditë të tëra në spital me sëmundjen e rëndë.
Por atij në sistemin e shpartalluar mjekësor i mungoi gjaku që mund të ishte edhe shpëtimtar, dhe ata që lëshojnë sot psherëtima hipokrizie për vdekjen e tij, dhe që udhëtojnë për vete me avion në dispozicion me paratë e taksapaguesve, vazhduan vakancat dhe nuk i siguruan gjakun që i nevojitej Arbenit dhe nuk e dërguan në një qendër më të specializuar me sistem qarkullimi jashtëtrupor, që edhe mund t’i shpëtonte jetën.
Miq, Arben Bajo ishte pedagog i Universitetit të Arteve dhe njëri prej skulptorëve më të talentuar të gjeneratës së tij. Veprat e tij, të ekspozuara brenda dhe jashtë vendit, u çmuan dhe u vlerësuan me interesin e merituar.
Me këtë rast shpreh ngushëllimet e mia më të ndjera familjes dhe miqve e të afërmve të të ndjerit Arben Bajo dhe lutem që shpirti i tij i mirë të gjejë paqen e merituar! Ngushëllime!! Sb
