Shqiptarët rezultojnë se janë më pak të lumtur edhe se qytetarët e Rusisë. Këto janë të dhënat e dala nga Raporti Botëror i Lumturisë për vitin 2025, të cilat i ka shpërndarë dhe ish-ministri socialist Arben Malaj.
Ai thumbon kolegët politikanë, duke theksuar se ky nivel shumë i lartë palumturie rrëzon çdo propagandë qeveritare dhe elektorale, duke provuar se një nga arsyet e vërteta të largimit masiv të shqiptarëve është gjendja në të cilën ndodhet vendi dhe vetë ata.
“Pershendetje, indeksi i lumturisë duhet t’u shërbejë politikanëve. Shqiptarët janë më pak të lumtur 5.4/10 edhe se rusët, me një nivel 5.9/10. Ky nivel shume i larte pa lumturie hedh poshtë çdo demagogji qeveritare dhe propagandë elektorale.
Indeksi tregon mungesen e lumturise ne jeten e perditeshme shqiptarëve.
Niveli 5.4 me i ulte se gjithe vendet e tjera shpjegon arsyet e zhgënjimit dhe largimit masiv te shqiptareve nga vendi. Çdo propagandë elektorale e zbukuruar tregon varfërinë shpirtërore të atyre që duan ta mbulojnë këtë situatë të mjerueshme me fjalë të bukura”, shkruan Arben Malaj.
Sipas Raportit Botëror për Lumturinë 2025, edhe qytetarët e vendeve të tjera të rajonit tonë rezultojnë më të lumtur se qytetarët shqiptarë. Finlandezët rezultojnë se janë njerëzit më të lumtur në botë për të tetin vit me radhë.
