Ish-mbrojtësi i Juventusit dhe kombëtares franceze, Patrice Evra mund të përfundojë pas hekurave të burgut. Ky është lajmi i bujshëm i prestigjozes britanike, “The Sun” e cila shkruan se Evra rrezikon burgun pasi akuzohet se ka shkelur të drejtat e njeriut.
Sipas “Sun” Evra është dëgjuar të thotë fjalën “pede” pas eliminimit të skuadrës së PSG-së nga UEFA Champions League nga Manchester United. Një fjalë që ka marrë konotacione si anti-homoseksuale dhe grupi i të drejtave të njeriut, “Rouge Direct” ka nisur tashmë procedime ligjoret ndaj Evras.
“Ne nuk mund të pranojmë që fyerjet nga një ish-kapiten i Francës të kalojnë. Ai ka shumë njerëz që e dëgjojnë, veçanërisht tek të rinjtë. Sanksionet dhe dënimet shembullore duhet t’u jepen atyre që mendojnë se mund të fyejnë njerëzit për shkak të seksualitetit të tyre.
“Kjo është e papranueshme dhe e dënueshme me ligj. Nëse Evra nuk e kupton se sa serioze kanë qenë fjalët e tij, ne duam që një gjyqtar t’ia kujtojë atë “.- tha Julien Pontes, zëdhënës i “Rouge Direct”.
Gazeta shkruan se 37 vjeçari mund të dënohet më një vit burg si dhe një gjobë prej 40.000 euro nëse ai shpallet fajtor për fjalë homofobike.
