Jani Kacifa, babai i ekstremistit grek, që u vra nga RENEA ditën e diel në Gjirokastër ka mbërritur në prokurorinë e Krimeve të Rënda mesditën e sotme për të dhënë dëshminë e tij në lidhje me ngjarjes. Ai ka udhëtuar nga Gjirokastra në Tiranë me një makinë me targa greke, i shoqëruar edhe nga një grup i medieve greke. Jani Kacifa është futur në ambientet e prokurorisë së bashku me një përkthyes dhe një përfaqësues ligjor të familjes.
Babai i minoritarit do të pyetet nga prokurori Njazi Seferi në lidhje me atë që di për ngjarjen. 35-vjeçari Kacifa u ekzekutua nga RENEA, pasi refuzoi që të dorëzohej, ndërsa trupi i tij ndodhet në morgun e QSUT për ekspertizë mjeko ligjore, pasi familja kundërshtoi autopsinë në Gjirokastër.
Ndërkohë ditën e djeshme konsulli grek në Shqipëri, ka zhvilluar një takim tek prokuroria e Krimeve të Rënda lidhur me hetimet për vrasjen e ekstremistit grek në Bularat të Gjirokastrës.
Mësohet se konsulli grek është takuar me prokurorin e çështjes dhe kreun e Krimeve të Rënda, Donika Prela.
Mësohet se konsulli grek është duke u interesuar për vazhdimësinë e hetimeve nga ana e prokurorisë shqiptare. Pala greke nuk ka asnjë tagër që të jetë pjesë e hetimeve, pasi vrasja ka ndodhur në Shqipëri.
Pritet që në ditët në vijim prokuroria e Athinës të dërgojë një letërporosi në adresë të prokurorisë së Krimeve të Rënda, ku do i kërkojë kësaj të fundit të njihet me të gjitha aktet hetimore, pse jo dhe të kërkojë kryerjen e veprimeve hetimore shtesë, për dobi të palës greke.
Grekët kanë kërkuar të asistojnë me ekspertë të mjekësisë ligjore dhe ekspertë balistikë për analizimin e të dhënave të armës, por një kërkesë e tillë është refuzuar nga prokuroria e Krimeve të Rënda, e cila ka pohuar se një gjë e tillë nuk e lejon legjislacioni shqiptar.
Njëherësh prokuroria e Krimeve të Rënda ka refuzuar të legjitimojë avokatin grek të zgjedhur nga familja e të ndjerit, duke pohuar se edhe praninë e tij, nuk e legjitimon legjislacioni shqiptar. Nisur nga këto kushte, familja ka kontraktuar një studio ligjore shqiptare.
