Jozefina Topalli, ka deklaruar se; është e gatshme të bëjë koalicion me opozitën për zgjedhjet e ardhshme parlamentare, por vetëm me një kusht që Lulzim Basha, nuk duhet të jetë kandidati i opozitës për Kryeministër.
“Jam e gatshme të bashkoj votat me opozitën me një kusht, të mos ketë të korruptuar si kryeministër. Domethënë që Lulzim Basha nuk do të jetë kryeministër”, ka thënë Jozefina Topalli, e ftuar në “Ditarin” e A2.
Ndër të tjera, Topalli është shprehur se; nuk ka ende një emër për kandidatin e saj për Kryeministër. “Por kam një parim, të jetë i pa korruptuar dhe të dojë vendin. Duket e thjeshtë por tejet e rëndësishme”.
Gjithashtu, ajo tha se; synimi i Lëvizjes për Ndryshim, është që të largojë Edi Ramën nga qeverisja, por edhe t’u japë shqiptarëve mundësinë për të larguar 3 kryetarët, siç i quajti ajo Kryeministrin, Presidentin dhe kreun e opozitës.
“Nëse do të dimë të kapim momentin e 25 prillit mund të sjelli, ndryshimi. Duke hyrë brenda, duke i kushtëzuar dhe duke bërë të mundur që të bien nga pushteti. E di që nuk është e thjeshtë, por e di që është e mundshme. Shqiptarët kanë mundësi që me 25 prill të hedhin votën kundër 3 kryetarëve. Në vend që të rinjtë në shtëpi votojnë për 3 kryetarët. Nëse dalin e votojnë për Lëvizjen për Ndryshim, faktikisht dalin e votojnë kundër 3 kryetarëve”, ka thënë Topalli.
Deri tani, ish-kryetarja e Kuvendit, nuk ka prezantuar emrat e kandidatëve për deputetë të partisë së saj, por këtë, tha ajo, do ta bëjë në ditët e ardhshme. “Nuk janë njerëz të politikës së të kaluarës, janë intelektualë dhe njerëz me reputacion në fushat përkatëse. Kemi nevojë për njerëz normalë, nuk na duhen gjeni”, kështu është shprehur Topalli në fjalën e saj.
