Fitorja e qendrës së djathtë në Itali ka qenë pjesë e diskutimeve të emisionit Open në News 24 këtë të mërkurë. E ftuar në studio deputetja e PD-së Grida Duma, komentoi fitoren e Giorgia Melonit si dhe bëri një analizë të figurës së saj politike.
Ajo theksoi se Giorgia Meloni, kryeministrja e ardhshme e Italisë ka krijuar një identitet të sajin dhe është paraqitur si një grua energjike, karizmatike dhe e vendosur.
“Unë mendoj që ajo nuk ka ndryshuar termat përgjatë fushatës, ka operuar me një strategji të mençur, duke filluar që nga rrjetet sociale. Ka vepruar në fillesë me gjysmë të vërteta. Është shprehur si konservatore e familjes, Zotit edhe kur nisi të shpjegoi politikat e veta. Edhe për abortin e ka thënë që më kanë keqinterpretuar. Nuk ka për të ndryshuar asgjë thotë për ligjin e abortit, por kush është grua dhe ka fëmijë unë i shtoj të drejtat. Kjo ka një ngjyrim drejt mbrojtjes së familjes. Meloni hyn tek politikanet që kam parë që ka një përgjigje për çdo çështje. Nëse e pyet për taksën ajo arrin të komunikojë qartësisht për të. Është e qartë në detaje, ka mesazh qartësi, politikë në çdo çështje. E pyet për çmimin e energjisë dhe të thotë përse duhet mbrojtur.
Ajo ka një përgjigje të qartë për çdo çështje. Ajo ka një energji karizmatike që është 50% e rritjes së peshës së vet në politikë. Ka qenë e qëndrueshme dhe nga ana tjetër është shumë identitare. Ajo ka një identitet të vetit, e thotë me energji të fortë. Nuk e ka populizmin joetik. Pra ka identitetin e vet si grua që si konservatore ka sfiduar edhe një element tjetër. Dhe tregon përse më pyesni mua dhe jo atë që nuk më ka propozuar. Pra luan në terrenin e origjinalitetit të saj”, tha më tej Duma.
