Një tjetër operacion i përbashkët kundër narkotikëve mes Policisë së Shtetit dhe asaj Italiane, Guardia di Finanza (GdF) e Pulias është finalizuar ditën e djeshme.
Në orët e para të mëngjesit të ditës së djeshme, rreth 7 milje (11 km) në afërsi të Brindisit pas shkëmbimit të informacionit me Policinë e Shtetit, GdF në Pulia ka ndaluar një skaf me 2 motorë të fuqishëm, me ngarkesë prej rreth 1.9 ton Cannabis Sattiva.
Autoritetet italiane arrestuan dy personat në bord, një shtetas italian D.P, 47 vjeç, Brindizi, Itali dhe një shqiptar, B.H, 25 vjeç, banues në Vlorë.
Ky operacion është pjesë e hetimeve të përbashkëta me policinë italiane Interforze dhe në veçanti me Guardia di Finanza në Durrës, Vlorë dhe ROAN GdF Bari, Pulia. Nga ana e tyre vijojnë hetimet për identifikimin dhe arrestimin e personave të tjerë të përfshirë në këtë trafik.
