Mbrëmjen e 4 qershorit të këtij viti, 29-vjeçari Marsel Shehu, kishte dalë për shëtitje bashkë me qenin e tij, pa e menduar se do të përfundonte në qeli.
Në orën 9 e 20 minuta, teksa qëndronte i ulur në një shkallë pranë Ministrisë së Brendshme, i riu është pikasur nga polici Abdulla Lika, i cili i është afruar duke i kërkuar të largohet, pasi po qëndronte në shkallët e një objekti të rëndësisë së veçantë.
Sipas deklarimeve të policit, i riu që mbante edhe një çantë në shpinë ishte ulur pranë hyrjes së Ministrit të Brendshëm. Sipas vendimit të gjykatës që disponon Euronews Albania, duke ndeshur refuzimin e të riut për t’u larguar, polici ka lajmëruar shefin e tij. 29-vjeçari është shoqëruar në komisariat dhe sipas pretendimit të policëve, i ka ofenduar dhe shantazhuar duke u bërë edhe foto.
Ndaj të riut Prokuroria ngriti akuzën e ‘mosbindjes ndaj urdhrit të punonjësit të policisë së rendit publik’. Me gjykim të shkurtuar, në përfundim i riu u dënua me 20 ditë burg, por ky dënim do të konvertohet me 60 orë pune me interes publik.
Gjykata e ka cilësuar të ligjshëm urdhrin e policies, për t’u larguar nga qëndrimi pranë hyrjes së Ministrit të Brendshëm dhe çmon se ky dënim do t’i shërbejë edukimit të të pandehurit si dhe parandalimit të përgjithshëm të kësaj vepre penale në shoqëri.
