Kryeministri i Kosovës, Albin Kurti ka folur për herë të parë pasi Kosova nuk u ftua në Samitin e Demokracisë që do të mbahet në Shtetet e Bashkuara të Amerikës. Kurti nga një tubim i LVV-së në Podujevë, tha se nuk ka asgjë për tu shqetësuar se Kosova nuk është ftuar nga SHBA.
“Nuk ka asgjë për tu shqetësuar e kemi shpjeguar edhe më herët këtë e ka bërë shumë thjesht edhe Ambasada Amerikane”, tha Kurti pasi u pyet nga gazetarët.
Për mos ftesën e Kosovës në Samitin e Demokracisë në SHBA ka pasur reagime të shumta nga politika kosovare. Nga Ambasada e Shteteve të Bashkuara të Amerikës në Kosovë thanë se “Jo të gjithë partnerët mund të përfshiheshin në këtë iniciativë”.
Më 9 dhe 10 dhjetor në Shtetet e Bashkuara të Amerikës do të mbahet për herë të parë Samiti për Demokraci, ndërsa tashmë po qarkullon në media lista me vendet që janë ftuar për të qenë pjesë e samitit, ku Kosova nuk ka figuruar në mesin e shteteve pjesëmarrëse.
