Kriza politike dhe tensionet mes palëve për zgjedhjet lokale të 30 qershorit duket se nuk e kanë penguar aspak Komisionin Qendror të Zgjedhjeve, që të vijojë punën normalisht.
Në mbledhjen e sotme, ky institucion ka shqyrtuar tre projektvendime të reja. Ata kanë të bëjnë me akdreditimin e pesë gazetarëve të Associated Press, për lirimin e sekretarëve në disa KZAZ, por edhe për dhënie autorizimi për ndryshimin e vendndodhjes për disa qendra votimi.
Njoftimi i KQZ-së
Tiranë më 26.06.2019Komisioni Qendror i Zgjedhjeve në mbledhjen e ditës së sotme shqyrtoi projektvendimet:
-“Për miratimin e gazetarëve të Associated Press, për vëzhgimin e zgjedhjeve për organet e qeverisjes vendore, të datës 30 qershor 2019”. KQZ vendosi të miratojë kërkesën e Associated Press, për akreditimin e 5 gazetarëve, për zgjedhjet për organet e qeverisjes vendore.
-“Për lirim dhe emërim të sekretarëve të KZAZ-ve nr 20, nr.36, nr.38, për zgjedhjet për organet e qeverisjes vendore të datës 30 qershor 2019”.
-“Për dhënie autorizimi për ndryshimin e vendndodhjes së disa QV-ve, për zgjedhjet për organet e qeverisjes vendore të datës 30 qershor 2019”.
