Flamur Noka, është me një këmbë jashtë grupit të PD-së. Mbrëmjen e djeshme, Lulzim Basha vendosi që ta shkarkonte nga posti i n/ kryetarit të Komisionit të Sigurisë Kombëtare dhe i dha një paralajmërim për përjashtim nga grupi demokrat. Argumentet e përdorura nga kryedemokrati ishin sipas tij shpifjet dhe sajesat nga Noka, të cilat po dëmtojnë partinë.
“Këto shpifje dhe sajesa të herëpashershme dhe të përsëritura, dëmtojnë interesin e Partisë Demokratike dhe të demokratëve, duke shfokusuar vëmendjen e betejës së opozitës ndaj të vetmit kundërshtar që është armiku i Shqipërisë dhe shqiptarëve Edi Rama” thuhet në njoftimin e PD-së. Por si rrodhën ngjarjet brenda një muaji në këtë pikë? Gjithçka nisi nga përjashtimi i Sali Berishës nga grupi i PD-së. Flamur Noka ishte një nga emrat e parë që doli kundër vendimit individual të Lulzim Bashës për të përjashtuar Sali Berishën nga grupi parlamentar.
Por nuk u mjaftua me qëndrimin në grup apo një deklaratë publike. Ish-ministri i Brendshëm u pozicionua hapur në krah të ish-kryeministrit, kundër kryetarit të partisë. Por duket se tre janë deklaratat e Flamur Nokës që kanë sjellë irritimin e Lulzim Bashës. Menjëherë pas përjashtimit të Sali Berishës, në 13 shtator Flamur Noka publikoi në Facebook vargjet e një poezie, të cilat lanë të kuptohej se armiku ka qenë gjithmonë brenda tyre, duke ju referuar kreut të opozitës, Lulzim Basha.
“Mora pushken dola n’mal, Te luftoja per atdhe.., Ku ta dija une i gjori.., Se a*rmiku ishim …Ne……” shkruante Noka.
Në 20 shtator vjen “përplasja” e dytë. Lulzim Basha doli kundër aksionit të udhëhequr nga Sali Berisha, i cili po mbledh firmat për mbledhjen e forumit më të lartë të PD, duke deklaruar prerë se ai nuk do të lejojë mbledhjen e Kuvendit kombëtar të PD. “Nuk ka dhe nuk do të ketë grupim antiamerikan nën siglën e PD-së. Nuk do të ketë Kuvend të PD-së, që vë në diskutim vendimet e qeverisë amerikane”. Flamur Noka në grup, por edhe hapur në media i bëri thirrje kryetarit Lulzim Basha që të mos e përdorë çështjen e “antiamerikanizmit”, pasi sipas tij kjo është inekzistente në PD.
Pika që “mbushi kupën” ishte dy ditë më parë. Kryedemokrati, referuar akuzave nga baza kundër tij u shpreh mbrëmjen e së dielës në mbledhjen e grupit se “Qeverisja 8 vjeçare e PD ka pasur pjesën e vet të mirë dhe ka pasur edhe llumin”. Noka u hodh sërish në sulm. Dje ai u shpreh se deri më sot “askush nuk ka guxuar që ta cilësojë anëtarësinë e partisë si llum”. Sipas tij, kreu Lulzim Basha i ka bërë anëtarësisë dhe elektoratit të PD-së një poshtërim të radhës. Kaq mjaftoi që Lulzim Basha mbrëmjen e djeshme të zhvendosej në kundërsulm duke e shkarkuar nga posti i nënkryetarit të komisionit dhe e paralajmëroi për përjashtim nga grupi i PD-së. Lëvizja duket e qartë, nëse Noka nuk tërhiqet e pret përjashtimit nga grupi i PD-së.
