La Liga rekord në merkato, deri tani ka shpenzuar 808 mln euro

0
2

Është vetëm muaji i parë, por shpenzimet në merkaton e verës shkojnë lumë. Rekordin mes ligave më të rëndësishme të Europës e mban ajo spanjolle, klubet e së cilës deri tani kanë investuar 808 milion euro. Meritë për këtë ka sigurisht Reali i Madridit, që ende pa u mbyllur qershori ka fituar titullin e “mbretit” në tregun e transferimeve.

Ndryshe nga të gjithë rivalët e mëdhenj në futbollin iberik dhe atë spanjoll, klubi “los blancos” ka bërë pesë goditje të mëdha, duke siguruar shërbimet e Eden Hazard, Luka Jovic, Ferland Mendy, Rodrygo dhe Militao. Ende në hije qëndron Barcelona, por klubi katalunjas pritet të rrisë ndjeshëm shpenzimet e La Liga në merkato, pasi projekton rikthimin e Neymar.

 

Në vendin e dytë, të paktën deri tani në merkaton e verës qëndron Bundesliga me 434 milion euro. Klubet gjermane kanë qenë shumë aktive, mbi të gjitha Borussia Dortmund, që ka investuar fortë që në ditët e para të këtij sesioni në tregun e transferimeve. Skuadra Serie A kanë shpenzuar në merkato 352 milion euro, por me goditjet që po përgatit mbi të gjithë Juventusi, kjo shifër projektohet të jetë disa herë më e lartë në fund të verës.

Ajo që bie në sy në këtë renditjes, është vendi i katërt i Premier League. Megjithëse kampionati anglez nis më shpejt dhe të gjitha ligat e tjera, klubet e tij kanë investuar deri tani vetëm 197 milion euro.