Kandidati i “Bashkë Fitojmë” në Kuçovë, Lefter Maliqi nuk e ka pranuar humbjen dhe i ka bërë thirrje Prokurorisë së Posaçme që të nisë hetimet për atë që ai e quan manipulim të votave nga oligarkët. Po ashtu, ai u bën thirrje dhe organizatave ndërkombëtare.
“I bëj thirrje SPAK, ndërkombëtarëve, OSBE se ky është mashtrimi më i madh elektoral i bërë ndonjëherë, TË MEREN MASAT! Ne nuk ndalemi, ne nuk dorëzohemi dhe do t’i shkojmë deri në fund kësaj beteje të orkestruar nga Oligarku Salillari, kryemashtruesi dhe dështaku Çuçi në krahë të milingonës Hajdari”, shkruan Maliqi.
Më tej, kandidati i dyshes Berisha-Meta që ka mbajtur dhe poste të larta si ai i deputetit, thotë se në ditët në vazhdim do të publikojë fakte dhe prova, që sipas tij do të bëjnë që Kuçova të merret nga opozita.
Sipas KQZ, Kreshnik Hajdari ka marrë 6,904 vota, kurse Maliqi 6,222 vota, 739 vota ka marrë kandidati Aliebajt.
Reagimi i plotë i Lefter Maliqit:
“Të dashur miq, njerëz me vlera të Kuçovës që më besuat e votuat, NE FITUAM! Ne fituam betejën e drejtë, fituam garën e moralshme, të besës dhe mbështetjes të çdo banori të ndershëm që kërkoi me bindje ndryshimin. Manipulatorët, të panikosur nga humbja filluan manovrat e vjedhjes, puçit dhe të tjetërsimit të votës.
E vërteta triumfoi, KUÇOVA NUK ËSHTË E PS, KUÇOVA NDRYSHOI, KUÇOVA HYRI NË HISTORI!
Garantoj, zotohem dhe ju premtoj me të gjithë qënien time se ky rezultat do të zbardhet shumë shpejtë, kjo është dhëmb për dhëmb deri në frymën e fundit, pasi oligarkët vodhën SHPIRTIN tuaj të PASTËR!
Të gjitha provat, faktet e ordinerëve po i publikojmë, çdo ditë, deri sa Kuçova të vij në duart tuaja ashtu siç ma besuat e dorëzuat dje me votën tuaj!
I bëj thirrje SPAK, ndërkombëtarëve, OSBE se ky është mashtrimi më i madh elektoral i bërë ndonjëherë, TË MEREN MASAT! Ne nuk ndalemi, ne nuk dorëzohemi dhe do t’i shkojmë deri në fund kësaj beteje të orkestruar nga Oligarku Salillari, kryemashtruesi dhe dështaku Çuçi në krahë të milingonës Hajdari.
Mesazhin e morët. KUÇOVA JU SHPORRI, KUÇOVA JU THEU, KUÇOVA DO NDRYSHIMIN!
Faleminderit dhe mirënjohje çdokujt që qëndroi me mua në këtë betejë që sapo nisëm bashkë. Do të jem këtu me ju ditë e natë, çdo orë që kalon deri sa ta zbardhim të vërtetën dhe kërkesën tuaj, madje deri sa të dorëzojmë në qeli të gjithë organizatën mafioze që ndërhyri në këtë proçes! Faleminderit, Lefter Maliqi!”
