Drejtuesi politik i Partisë Demokratike në Qarkun Vlorë, Bujar Leskaj, ka zhvilluar një takim sot me persona me aftësi ndryshe.
Në një postim në Facbeook, Leskaj shkruan se është tronditëse gjendja në të cilën i ka lënë kjo qeveri në ikje këto 8 vite.
“Pensionet e tyre qesharake dhe nuk u dalin jo për të paguar drita, ujë apo ilaçe, por as për t’u ushqyer e veshur, barnat që ata marrin me rimbursim janë reduktuar, shumicës prej tyre u është ndërprerë ndihma sociale; shumicës prej tyre u janë hequr personat kujdestarë që duhet të paguheshin nga shteti (duke u dhënë paga të ulëta në kufitjë e mbijetesës, që t’i detyrojnë të largohen nga skema)… Për punësim të këtyre njerëzve, të kësaj kategorie që kërkon dinjitet e barazi nuk bëhet fjalë!
Qeveria e propagandës dhe e fasadave këta njerëz i ka braktisur në mëshirë të fatit. E, pra! Në 25 prill edhe për këta bashkëqytetarë me aftësi ndryshe, së bashku me Partinë Demokratike do të triumfojë edhe dinjiteti, mirëqenia; do të rikthehet buzëqeshja dhe shpresa.
Qeveria e Lulzim Bashës është angazhuar që të ulë në mënyrë drastike varfërinë dhe t’i shikojë në sy e me prioritet këta njerëz. Jo me lëmoshë, por me dinjitet, punësim dhe respekt të vlerave që ata kanë dhe kontributit që mund t’i japin shoqërisë shqiptare. Është angazhuar të rrisë pensionet dhe pagat. Trajtimi mjekësor do të jetë dinjitoz; ndihma sociale do t’u rikthehet, në mënyrë që jetesa e tyre të jetë normale”, shkruan Leskaj në Facebook.
