Mbi pesë orë diskutime u zhvilluan dje nga një grup deputetësh të PD, të cilët folën mbi fatin e partisë dhe formulën e bashkimit. Lefter Gështenja, i cili ishte një nga dy iniciuesit e takimit, bashkë me Flamur Hoxhën, deklaroi në MCN TV se në të ardhmen duhet një opozitë e koordinuar. Ndër të tjera Gështenja tha se partia ka nevojë për bashkëdrejtim, pasi ka mbaruar koha e unit.
Takimi i djeshëm ishte një kafe pune, bashkëbisedim i lirë me njëri-tjetrin. Na u bashkuan më shumë se 23 deputetë. Një pjesë e mirë kishin konfirmuar ardhjen, por për arsye personale nuk ishin. Nuk mund të fshehim që trajtuam edhe çështjet e ditës, situatën politike. Nuk mendoj që në PD ka luftë. Kemi situatë jo normale. Ky takim ishte privat dhe informal. Koha që ne konsumuam, 5 orë e gjysmë, tregoi që kjo kafe ishte shumë e vlefshme. Kishim nevojë të flisnim me njëri-tjetrin, në atë kafe informale. Disa media na kanë etiketuar si grupi i Bashës, apo i Alibeajt, ky grup nuk identifikohet nga një njeri. Unë besoj që partia ka nevojë për bashkëdrejtim. Ka mbaruar koha e unit. Duhet që PD vërtet të jetë më demokratike. Nuk mund të vazhdohet më me këtë situatë kaotike. Ne po bëjmë opozitë individuale, s’kemi diçka të koordinuar. Imagjino 52 deputetë në Parlament, çfarë opozite reale do ishte. Fakti që ishim të pakoordinuar, kjo kërkohet. Të jemi të konsoliduar. Të parët të jemi të konsoliduar ne si grup, që s’morëm pjesë në Kuvendin e 30 prillit”.
I pyetur nëse grupimi shkon përtej Berishës dhe Alibeajt, Gështenja tha se përpara ka tre alternativa.
Ky grupi duhet të jetë i unifikuar, s’mund të vazhdohet kështu. Tre alternativa kemi, e para të vazhdojmë kështu si jemi, e dyta, të shohim mundësinë e bashkimit me Rithemelimin, që duhet të jetë vendim grupi, e treta të konsolidohemi si grup dhe të kemi veprim të qartë. Nuk është normal edhe etiketimi për kolegët, ata që kanë dalë nga Rithemelimi përfaqësojnë demokratët dhe këta përballë s’përfaqësojnë asgjë. Kjo s’është normale. Nuk ka qenë qëllimi t’i tregojmë forcën Berishës. Qëllimi është të jemi në terren. I kam kërkuar Bashës të jemi në terren, edhe deputetëve, shkëputja lë fushë të lirë edhe për mazhorancën. Ne nuk vendosim kushte për Berishën”.
Gështenja tha se nuk ka kushte për Berishën, ndërsa u shpreh se nuk ka pasur ftesë për Bashën, që të ishte i pranishëm në takim. I pyetur nëse ky grup mund të shkojë përtej Berishës dhe Alibeajt, Gështenja u përgjigj “t’ia lëmë kohës”.
Nuk ka kushte. Ky grup ka pasur një propozim real, platforma e bashkimit të PD. Nëse ne kemi dhënë një ofertë, a ka pasur nga pala tjetër një ofertë?! Nuk është shqetësimi kush do jetë fituesi brenda PD-së, por si do largojmë Ramën. Do kemi takime të tjera, do jetë vendimmarrje e grupit. Zgjatja në 5 orë e gjysmë besoj që ishte diskutim konstruktiv. Ajo që është e qartë është që duhet të kemi një opozitë më të fortë se kjo sot. S’ka pasur ftesë për z.Basha në këtë takim. Nuk është e vërtetë që ne jemi mbështetësit e Bashës. Gëzoj respekt për z.Basha, por s’mund të etiketohet një grup si përkrahës i njërit dhe tjetrit, kjo është ‘përça dhe sundo’ ”.
S’jam dakord me një proces të njëanshëm, që ka lënë shumicën e strukturës së PD jashtë procesit. Hapi i parë të bashkojmë demokratët, e dyta të bashkojmë të gjitha partitë e djathta, e treta të bashkojmë të gjithë faktorët kundër qeverisë, përfshi LSI-në. Unë nuk do të doja që hapi i parë të ishte bashkimi me LSI-në. Alibeaj do vazhdoj të jetë kryetar i grupit parlamentar, për ecurinë grupi do vendosë. PD ka nevojë për bashkdrejtim, jo drejtimin e unit. Edi Ramën mund ta rrëzojë vetëm një njeri, jo. Duhet të gjithë bashkë të bashkëpunojmë”.
Deputeti tha se protestat e nisura nga Berisha s’ishin pjesë e diskutimit, teksa e konsideroi problem faktin që po bëhet një opozitë e ndarë.
Nuk ishte pjesë e diskutimit, të kësaj kafeje. Grupi parlamentar i PD-së, nuk është që s’po bëjmë opozitë, problemi është që po bëjmë opozitë të ndarë, ndërkohë që kërkohet të kemi opozitë të koordinuar. 59 deputetë duhet të jemi të organizuar, të koordinuar. Imagjinoni 59 deputetë të koordinuar të godasin qeverinë në tenderat, korrupsion, përfshirjen e qeverisë në afera. Koha do tregojë se do kemi hapa të qartë dhe të sigurt se ku do kalojmë. Nëse ka një njeri të interesuar për përçarjen e PD, ai është Edi Rama. Këta e ka shfrytëzuar edhe për hapjen e negociatave. Nuk ka ndodhur në historikun e këtij procesi, që opozita të mos jetë pjesë e delegacioneve. Edi Rama nuk duhet të gëzohet sepse është një nga personat që e ka frenuar këtë proces. Nëse Rama ikën, me një qeverisje të djathtë do përshpejtohet. Nuk i përkas njerëzve që mendojnë se ish-kryetari i partisë (Lulzim Basha) ka shitur interesat e partisë për interesa personale”.
Gështenja e konsideroi AKSHI-n një institucion të korruptuar, duke u shprehur se do te ketë një denoncim në SPAK për mënyrën si janë marrë paratë e shqiptarëve, si janë realizuar procedurat tenderuese.
