I hiqet licenca shkollës private “Udha e Shkronjave”. Vendimi është përcjellë nga ministrja e Arsimit, Besa Shahini përmes një statusi në facebook.
Shkak u bë urdhri i drejtuesve të kësaj shkolle për të mbyllur këtë institucion me dy javë me pretendimin për parandalimin e një situate virale të koronavirusit.
Shahini thotë se drejtuesit e shkollës duhet të ndiqen penalisht.
‘Shkolla mbyllet jashtë planit të vitit shkollor VETËM me urdhër ministri. Udhëheqësit e një shkolle private kishin vendosur të mos respektonin këtë dhe e kanë mbyllur shkollën për 2 javë. Në kushte të kësaj paligjshmërie, jemi të detyruar që shkollës t’ia heqim licencën. Nxënësit do të transferohen në një shkollë tjetër. Ndërsa udhëheqësit e shkollës që përhapin panik duke mbyllur shkollën në mënyrë të jashtëligjshme, për gjoja parandalim të një situate virale e cila NUK ekziston në Shqipëri, duhet të ndiqen nga organet e drejtësisë” shkruan Shahini ne nje status ne facebook.
