Mjekët kërkojnë masa për dhunën

0
2

Bluzat e bardha kërkojnë marrjen e menjëhershme të masave për të ndalur dhunën ndaj mjekëve në detyrë. Presidenti i Urdhrit të Mjekut, Fatmir Brahimaj, nënvizon se situata e përsëritur është një indinjatë e madhe për mjekët. Pesë raste të dhunës ndaj mjekëve kanë ndodhur vetëm për vitin 2019. Edhe pse kryeministri Rama premtoi ashpërsimin e ligjit ndaj personave që ushtrojnë dhunë ndaj bluzave të bardha, ende nuk ka asnjë ndryshim. Të shtunën një tjetër mjeke u dhunua në Lezhë.

Fatmir Brahimaj: Po bëhen mjaft të shpeshta dhe ne veç shqetësimit të madh për pasigurinë në punë, për kushtet dhe standardin që kërkon puna sidomos në institucionet shëndetësore. Ne kemi ngritur zërin fort për të siguruar personelin në punë.  

Urdhri i Mjekut kërkon që të merren menjëherë masa për të ndaluar dhunën ndaj mjekëve.

Fatmir Brahimaj: Zëri tonë duhet të dëgjohet sa më parë dhe më shpejt nga struktura shtetërore për të bërë ndryshimet përkatëse ligjore që na janë premtuar me qëllim që ky akt të quhet vepër penale dhe të marrë dënimin e merituar.

Grupet e punës janë ende në përpunim të draftit për ashpërsimin e ligjit për personat që ushtrojnë dhunë ndaj bluzave të bardha, duke e konsideruar këtë të fundit si një vepër penale.

Vetë kryeministri Rama gjatë takimit me mjekët tha se kush do të godasë bluzën e bardhë, do të hyjë në burg.