Partia Socialiste, ashtu siç u bë e ditur ditë më parë ka mbledhur sot në orën 10:00 Asamblenë Kombëtare, ku të gjithë të pranishmit me kërkesë të Kreut të Grupit Parlamentar Taulant Balla kanë mbajtur një minutë heshtje në nder të Luan Hajdaragës, ish-ministrit socialist që u nda nga jeta një muaj më parë.
“Sot jemi vetëm 250 ditë larg nga zgjedhjet vendore dhe prej sot nisim punën ku synojmë të jemi fitues në 61 Bashkitë e vendit me aleatin tonë të vetëm, qytetarët”, – është shprehur Balla.
Gjithashtu, ai ka shtuar se gjithë debati politikë do të fokusohet te hallet dhe problemet e njerëzve të këtij vendi dhe jo te shterpësia e kësaj opozite, e cila siç tha do të vazhdojë të hedhë baltë mbi çdo punë.
“Jemi 250 dite larg zgjedhejve vendore. Do garojmë si kandidate fitues ne 61 bashkite. Aleati yne i vetëm ne zgjedhje janë qytetaret. Jemi te gatshëm te bashkëpunojmë me opozitën”- tha Balla.
Ndërkohë në mbledhjen e sotme pritet të ketë ndryshime në sekretariatin ekzekutiv, ku përveç emrave, do të ketë dhe rregullime të funksioneve të tyre.
Në këtë asamble do të ketë një raport mbi performancën e përfaqësuesve të PS-së në qeverisjen vendore, raport kombëtar për procesin e bashkëqeverisjes si dhe raport mbi punën e grupit parlamentar të PS-së.
Gjithashtu, do të nisë dhe ngritja e strukturave koordinuese elektorale për zgjedhjet vendore të vitit 2019.
AXHENDA E ASAMBLESË KOMBËTARE
- Raport Kombëtar i Llogaridhënies Publike të Qeverisë “Puna për Shqipërinë që duam”.
- Raport i Grupit të Punës të Asamblesë Kombëtare të Partisë: “Mbi performancën e përfaqësuesve të Partisë Socialiste në qeverisjen vendore”.
- Udhëzim për fillimin e procedurave për përzgjedhjen e kandidatëve për anëtarë të Këshillave Bashkiake për zgjedhjet vendore 2019.
- Udhëzim për ngritjen e strukturave koordinuese elektorale për zgjedhjet vendore 2019.
- Raporti Kombëtar i Procesit të Bashkëqeverisjes deri më datë 31.08.2018.
- Raport mbi punën e Grupit Parlamentar të Partisë Socialiste në dy sesionet e para të Legjislaturës IX.
- Informacion mbi punën e strukturave vendore të Partisë në raport me Axhendën Politike Vjetore të Partisë.
- Udhëzim për fillimin e Fushatës Kombëtare “E gjithë vëmendja te Ju”.
- Miratimi i strategjisë: “Partia Socialiste e hapur për Ty”.
- E drejta e votës për shqiptarët që jetojnë jashtë vendit dhe informacion mbi ecurinë e Reformës Zgjedhore.
- Raport mbi gjendjen aktuale të Partisë dixhitale.
- Vendim për unifikimin e Regjistrit Dixhital të PS.
