Deputeti i PD Ervin Salianji në një dalje për mediat ka thënë sot se kryeministri Edi Rama ka angazhuar në fushatën e 6 marsit, Tom Doshin dhe Vangjush Dakon, të dy të shpallur non grata nga SHBA. Sipas Salianjit edhe pse i shpallur non grata nga SHBA, Edi Rama e ka emëruar Tom Doshin si drejtues politik dhe shef të fushatës së kandidates së PS në Shkodër.
Ndërkohë sipas denoncimit të tij të njëjtën gjë ka bërë edhe në Durrës ku shton se qytetarët e dinë se kandidatja për kryebashkiake në këtë qytet është vegël e Dakos.
DEKLARATË E PARTISË DEMOKRATIKE, ERVIN SALIANJI
Pa miratimin e Tomës asgjë nuk mund të ndodhë në Shkodër. Edi Rama i ka dorëzuar Tom Doshit çelësat e qeverisjes së Shkodrës. Tom Doshi vendos, kush hyn në punë, kush bëhet shef dhe drejtor, kush merr tendera, kush bëhet deputet e së fundmi siç e thotë dhe vetë kush kandidon për kryetare bashkie.
Dëgjojeni vetë çfarë thotë ai.
“Edhe pse i shpallur non grata nga SHBA, Edi Rama e ka emëruar Tom Doshin si drejtues politik dhe shef të fushatës së kandidates së PS në Shkodër. Edi Rama bëri sikur e largoi Tom Doshin pas shpalljes non grata, po çdo shqiptar e di, e më shumë se kushdo tjetër socialistët shkodranë, e dinë se pa miratimin e Tom Doshit asnjë vendim nuk merret në Shkodër.
Pyetja që shtohet para socialistëve dhe qytetarëve shkodranë është; A janë ata të gatshëm ti dorëzojnë bashkinë Tom Doshit? A e pranojnë ata që çdo vendim në bashki të merret për llogari të një non grate të SHBA? A ka turp më të madh për socilistët që gjithçka në emër të tyre ta vendosë Tom Doshi?
Krahas Tom Doshit në Shkodër, Edi Rama ka aktivizuar edhe Vangjush Dakon në Durrës. Çdo durrsak e di që kandidatja është vegla e Dakos. Socialistëve durrsakë ua zgjedh kandidaten një tjetër non grata nga SHBA.
Edi Rama nuk ndahet nga Non-gratat. Sepse pa ta, ai, asnjë dite nuk do të qëndronte në pushtet. Dhe sot gjithë pushtetin ua ka dorëzuar atyre në këmbim të shitblerjes së votave. Sepse këta nuk duan që Shqipëria të ndryshojë!”- thuhet në videon e publikuar nga PD.
