Ish-ministri i Jashtëm, Paskal Milo, e sheh si pozitive vizitën e kryeministrit Rama në Gjermani. Megjithatë, pavarësisht mbështetjes së kancelarit gjerman për Shqipërinë në rrugëtimin drejt BE-së, Milo thotë se vendi mbetet peng i Maqedonisë së Veriut.
“Vizita në përfundim të saj ishte pozitive. Qoftë edhe për faktin që u takuan kryeministrat, vendosën kontaktet. Qoftë edhe kaq është për t’u përshëndetur. Gjermania është vetëm një anëtar në mes shumë të tjerëve. Por është zë i madh, zë kryesor. Fakti që Sholz do të mbështesë hapjen e negociatave është i rëndësishëm. Ne jemi peng i Maqedonisë së Veriut, peng i pretendimeve bullgare, që vështirë se mund të gjejnë zgjidhje”, u shpreh Milo në MCN TV.
Në lidhje me nismën për Ballkanin e Hapur, Milo u shpreh se pavarësisht se është pozitive, nga Gjermania shihet si mbivendosje e procesit të Berlinit dhe si e tillë nuk do të gjejë mbështetje.
“Çdo nismë që synon një treg unik të Ballkanit Perëndimor dhe të garantojë zbatimin e 4 lirive që qëndrojnë në themel të BE është pozitiv. Por duke lënë mënjanë realitetin, e shoh të vështirë realizimin e hapësirës unike ballkanike perëndimore. Është e vërtetë që gjermanët nuk e kanë për zemër Ballkanin e Hapur sepse ata mendojnë se është mbivendosje e Procesit të Berlinit. Ata duan ta rivitalizojnë procesin e Berlinit dhe të mos i japin hapësirë Ballkanit të Hapur. Ai që merr një nismë, do ta mbrojë, do ta shtyjë përpara”, tha Milo.
