Kreu në largim i Këshillit Europian Donald Tusk, i bëri thirrje të enjten Parlamentit Europian të miratojë kandidaturën e ministres gjermane të Mbrojtjes, Ulrsula Von der Leyen, si kryetare e Komisionit të BE-së.
“Për herë të parë ne arritëm një ekuilibër të shkëlqyer gjinor për postet kryesore. Europa jo vetëm që po flet për gratë, por edhe po i zgjedh ato. Besoj se kjo do ta frymëzojë Parlamentin Europian në vendin e tij,” u tha Tusk ligjvënësve të rinj.
Por jo shumë prej tyre e pëlqyen retorikën e Tusk-ut. Fjalimi i tij u prit me rezistencë, pasi shumë ligjvënës pretenduan se kandidimi i von der Leyen ishte jo demokratik dhe që u shërben nevojave politike të krerëve të shteteve që e mbështetën.
“Me gjithë respektin president Tusk, unë nuk mund të mbështes mënyrën se si rrodhën ngjarjet dhe mungesën e respektit që ju treguat ndaj institucioneve të tjera,” tha zv./kryetari i grupit të Partive Popullore Europiane, Esteban González Pons.
“E ardhmja e Europës nuk mund të vendohet pas dyerve të mbyllura dhe me komplote sekrete,” tha eurodeputeti dhe shtoi se do ta mbështesë kandidaturën vetëm për shkak të përgjegjësisë politike.