Presidenti i Republikës Ilir Meta ka përshëndetur rezolutën e Parlamentit Europian që dënon qartë sipas tij agresionin rus ndaj Ukrainës.
Përmes një postimi në Facebook, Meta shkruan se miratimi i kësaj rezolute dëshmon dhe vëmendjen e shtuar ndaj vendeve të rajonit për një rrezik që i kanoset jo vetëm Ukrainës por edhe Europës dhe botës së lirë e demokratike.
Postimi i plotë:
Përshëndes Rezolutën e Parlamentit Europian që dënon qartë dhe pa ekuivok agresionin rus kundër Ukrainës!
Miratimi me 637 vota i kësaj rezolute që prek të gjitha aspektet politike, ekonomike, diplomatike, humanitare, ligjore, si dhe pasojat tragjike që mund të shkaktojë përshkallëzimi i situatës, dëshmon solidaritetin dhe unitetin europian përballë rrezikut që i kanoset sot jo vetëm Ukrainës por edhe Europës dhe botës së lirë e demokratike.
Përshëndes vëmendjen e shtuar të Parlamentit Europian edhe ndaj rajonit tonë, çka duhet të na shtojë vigjilencën ndaj çdo tentative për destabilitet nga aktorë jomiqësorë.
I bëj thirrje Kuvendit të Shqipërisë që përmes një rezolute të shprehë qartë dhe pa vonesë vullnetin e tij kundër pushtimit të Ukrainës, ngjashëm me vendet e tjera të NATO dhe BE!
