Studiuesit kanë përkthyer simbolet e lashta të famshme në një tempull në Turqi dhe ato tregojnë historinë e një ndikimi shkatërrues të një komete më shumë se 13.000 vjet më parë.
Duke e kontrolluar këtë ngjarje me simulimet kompjuterike të Sistemit Diellor rreth asaj kohe, hulumtuesit në vitin 2017 sugjeruan se gdhendjet mund të përshkruanin një ndikim të kometës që ndodhi rreth vitit 10.950 pes – për të njëjtën kohë që filloi një epokë mini akullnajore që ndryshoi përgjithmonë qytetërimin.
Kjo epokë akullnajore, e njohur si Dryas i Ri, zgjati rreth 1.000 vjet dhe konsiderohet një periudhë e rëndësishme për njerëzimin, për shkak se ishte rreth asaj kohe kur bujqësia dhe qytetërimet e para neolitike u ngritën – potencialisht në përgjigje të klimës së re të ftohtë.
Periudha ka qenë gjithashtu e lidhur me zhdukjen e mamuthëve.
Por megjithëse epoka Dryas është studiuar tërësisht, nuk është e qartë saktësisht se çfarë e shkaktoi periudhën. Një goditje komete është një nga hipotezat kryesore, por shkencëtarët nuk kanë qenë në gjendje të gjejnë prova fizike të kometave nga ajo kohë.
Ekipi nga Universiteti i Edinburgut në Mbretërinë e Bashkuar thotë se këto gdhendje, që gjenden në atë që besohet të jetë tempulli më i vjetër i njohur në botë, Gobekli Tepe në Turqinë jugore, tregojnë prova të tjera se një kometë shkaktoi këtë periudhë të quajtur Dryas.
