Edi Rama ka vazhduar me kritikat e forta në drejtim të kryebashkiakëve socialistë.
Teksa foli për zgjedhjet e ardhshme lokale që janë në prag, Rama tha se një pjesë e mirë e kryebashkiakëve, nuk kanë moral që të kërkojnë një mandat tjetër në kurriz të PS-së.
Rama tha se shumë prej kryebashkiakëve, nuk i përgjigjen ministrive, dhe ankesave të qytetarëve, edhe pse e kanë detyrim ligjor.
“Zgjedhjet vendore janë në prag, Partia është garanci edhe për këto zgjedhje, patjetër këto ndryshime do ti japin partisë më shumë shanse. Unë nuk jam shumë optimist për një pjesë jo të vogël të bashkive tona, mesa duket disa kryetarë bashkish, që u zgjodhën pa garë, në një ndeshje pa kundërshtar, kanë vazhduar të qendrojnë në krye të bashkive, a thua se kundërshtarët e komunitetit nuk ekzistojnë, a thua se papastërtia nuk ekziston.
Po marr papastërtinë që është A-ja, një pjesë e konsiderueshme e kryebashkiakëve janë krah më krah me ne, për të garantuar që Shqipëria të mbyllë këtë kapitull, një pjesë tjetër nuk janë angazhuar fare në këtë proces.
Njësoj siç është fatkeqësi, që të shohësh se ngritja e këshillave rinore, i janë përgjigjur vetëm 44 bashki, afati ka kaluar dhe është stërkaluar, nuk dua ti marr këtu me emra. Pyetja që ju bëj unë këtu është: Po me çfarë merreni, çfarë do tju thoni të rinjve dhe të rejave kur të vijnë zgjedhjet, si do ju dilni përpara.
Ashtu siç është për të vënë duart në kokë që ministritë që janë shumë më larg qytetarëve, në raport me bashkitë, që janë me ligj dhe zakon më pranë tyre, e kanë mësuar më në fund se ankesat e qytetarëve duhet të marrin përgjigje në kohë. Po si ka mundësi? Si ka mundësi që nuk e konsiderojnë ata kryetarë bashkie, se çfarë mundësie e jashtëzakonshme është që të kesh në dorë këtë instrument si bashkëqeverisja, që të kuptosh në kohë reale se cilat mekanizma, nuk përgjigjen”, tha Rama.
