Ish-Presidenti i Republikës dhe njëherazi anëtar i Komisionit të Rithemelimit, Bujar Nishani ka përshëndetur zhvillimin e primareve në PD, në kuadër të kandidatëve për zgjedhjet lokale të pjesshme të 6 marsit.
Postimi i plotë i Bujar Nishanit:
Të dashur miq, anëtarë të Partisë Demokratike në Durrës, Shkodër, Peshkopi, Lushnje, Vorë, Rrogozhinë, duke shprehur të gjithë respektin dhe mirënjohjen për angazhimin qytetar e politik.
Komisioni i Rithemelimit të Partisë Demokratike miratoi kandidaturat e ardhura prej jush si vullnet i lirë qytetarie nga ana juaj.
Ky ishte shembulli i parë i demokratëve për të gjithë shqiptarët se si demokracia dhe liria duhet të funksionojë.
Nesër, ditën e dielë ju keni në dorë provën e dytë për shqiptarët se e vërtera, e drejta, transparanca dhe dinjiteti funksionojnë.
Ky është akti më madhor i demonstrimit të së drejtës, vërtetës dhe integritetit, jo vetëm për ne si Parti Demokratike por për të gjithë shqiptarët.
Suksese për ditën e nesërme !
Jemi të gjithë me ju, me zemër, me shpirt, me mëndje e vetëdije qytetare.
Beteja jonë e përbashkët është e gjatë por do të jetë veç triumfuese sepse është beteja për Shqipërinë ndryshe.
