Princ Leka ka marrë pjesë sot në përurimin e shtatores së Mbretëreshës Geraldinë në Bulevardin Zogu I, në sheshin pranë Ministrisë së Drejtësisë. Ai citon fjalët e shkrimtarit Ismail Kadare për gjyshen e tij, teksa shkruante se vendimi për t’u kthyer në atdhe ishte një lajm i gëzuar për të gjithë shqiptarët.
“Duke cituar mikun tim dhe të Elias, shkrimtarin tonë të madh Ismail Kadare, që përpara 20 vitesh i shkruante kështu gjyshes time:
“Zonjë e lartë, vendimi juaj për t’u kthyer e për të jetuar në Shqipëri, ka qenë për mua, dhe kam bindjen se do të jetë për shumicën e shqiptarëve një lajm i gëzuar dhe jashtëzakonisht prekës. Ju po ktheheni në vendin që fati e solli të bëhet atdheu i juaj, ndonëse ky vend ju ka sjellë shumë më tepër brenga sesa gëzime. Me këtë akt të lartë, ju na jepni një mesazh të gjithëve, mesazhin fisnik se: Atdheu mund të jetë i dashur edhe kur është i varfër dhe i vështirë”, shkruan Princ Leka.
