GJKKO vendosi të lë në fuqi vendimin e dënimit me dy vite burg për ish-kryeprokurorin Adriatik Llalla.
Tashmë pritet që ish-zyrtari i lartë i organit të akuzës të arrestohet për vuajtjen e dënimit. Por Llalla nuk ishte i pranishëm në këtë seancë apo edhe disa seanca të mëparshme.
Sipas avokatit, Llalla vuan nga një sëmundje dhe ndodhet në regjim spitalor, mendohet jashtë shtetit. Edhe avokati i tij, pas përfundimit të seancës tha se nuk ka dijeni për vendndodhjen e Llallës.
Avokati kundërshtoi vendimin duke e quajtur të padrejtë pasi gjykata s’ka konsideruar pretendimet e palës mbrojtëse.
“Jemi me gjykim të padrejtë. Di që është në spital. Gjykata edhe e shkallës së parë edhe e Apelit, ka bërë copy-paste vendimin pa marrë parasysh asnjë detaj të mbrojtjes. Do ta çojmë në Gjykatën e Lartë. Nuk e di ku ndodhet, mund të jetë edhe në Shqipëri. Gjykata nuk ka konsideruar pretendimet tona, që do të thotë të dënohesh për një vepër penale që nuk e ke kryer, për një deklarim që e ke kryer”, u shpreh avokati i Llallës, Sokol Azizi.
