Ministria e Mbrojtës së Kinës tha të enjten se anijet ushtarake kanadeze kanë lundruar përreth Tajvanit, në pjesën që e ndan ishullin me pjesën tjetër të Kinës, e që shihet si akt që mund t’i prishë marrëdhëniet bilaterale.
Kalime të tilla e kanë nervozuar Kinën, e cila pretendon se Tajvani është pjesë e territorit të saj, shkruan Euronews. Kina këtë javë bllokoi të gjitha importimet e mishit nga Kanadaja, si një masë ndaj tensioneve mes dy vendeve. Kina kërkon që Kanadaja të lirojë zyrtaren e Huawei e cila ishte arrestuar në dhjetor me kërkesë të SHBA-së.
Kalimi ndodhi për shkak se anijet kanadeze po shkonin nga Vietnami për në detin e Koresë Jugore, ku Kanadaja po ndihmon në ndalimin e kontrabandës me anije.
“Transiti përmes ujërave të Tajvanit nuk vlen të komentohet” tha zëdhënësi i qeverisë kanadeze, Ashley Lemire. Ajo tha se anijet kanadeze vetëm kanë bërë një kalim.
