Ruçi uron Kryetaren e Kuvendit të Kosovës për 12-vjetorin e Pavarësisë: Realizim i aspiratave të vëllezërve kosovarë

0
34
Zjarr Televizion Ad This is a sample article. ...

Me rastin e 12-vjetorit të Pavarësisë së Republikës së Kosovës, Kryetari i Kuvendit, Gramoz Ruçi, i ka dërguar një letër urimi Kryetares së Kuvendit të Kosovës, Vjosa Osmani.

Në mesazhin e tij, Ruçi shprehet se pavarësia e Kosovës është realizim i aspiratave të vëllezërve kosovarë për të pasur shtetin e tyre demokratik, për të vendosur për të ardhmen e vet dhe për të kontribuar në zhvillimin, mirëqenien, paqen dhe sigurinë e Republikës së tyre dhe në rajon e më gjerë.

Kreu i Kuvendit shprehet se mirënjohja për çlirimin dhe pavarësinë e Kosovës ndaj aleatëve strategjikë, konkretizohet në partneritetin për përballimin e sfidave të sotme.

“Ju uroj nga zemra këtë ditë të shënuar për Kosovën, Shqipërinë dhe të gjithë shqiptarët.
Pavarësia e Republikës së Kosovës është realizimi i aspiratave të vëllezërve kosovarë për të pasur shtetin e tyre demokratik, për të vendosur për të ardhmen e vet dhe për të kontribuar në zhvillimin, mirëqenien, paqen dhe sigurinë e Republikës së tyre dhe në rajon e më gjerë.
Pavarësia e Republikës së Kosovës u arrit me luftën e Ushtrisë Çlirimtare të Kosovës, sakrificat e qytetarëve si edhe jetët e mijra dëshmorëve të saj, të cilët shqiptarët, kudo ku jetojnë, do t’i kujtojnë e nderojnë përjetësisht.
Pavarësia e Republikës së Kosovës është rezultat edhe i mbështetjes së pashembullt të aleatëve të mëdhenj të Kosovës dhe të të gjithë shqiptarëve, Shteteve të Bashkuara të Amerikës, NATO-s dhe Bashkimit Europian. Lufta për pavarësinë e Kosovës ishte një luftë unike për të mbrojtur vlerat dhe për të sjellë e garantuar paqen në Kosovë e në rajon.
Të gjithë shqiptarët u jemi mirënjohës aleatëve tanë strategjikë për çlirimin dhe pavarësinë e Kosovës dhe kjo mirënjohje shprehet e konkretizohet në bashkëpunimin e partneritetin e ngushtë me Shtetet e Bashkuara të Amerikës, NATO-n dhe Bashkimin Europian në përballimin e sfidave të zhvillimit dhe të së ardhmes së Republikës së Kosovës si edhe paqes, sigurisë e stabilitetit në rajon”, shkruan në mesazhin e tij të urimit, Kryetari i Kuvendit, z. Gramoz Ruçi.

Zjarr Tv Ad