Gjatë tre viteve të veprimit të ligjit të Vetingut, përfaqësuesit e Shteteve të Bashkuara të Amerikës dhe Bashkimit Evropian në Operacionin Ndërkombëtar të Monitorimit të Vetingut, kanë identifikuar një listë me 12 gjyqtarë dhe prokurorë, të cilët sipas tyre nuk duhet të shërbejnë në sistemin e drejtësisë shqiptare. Gjyqtarët dhe prokurorët e kësaj liste janë konfirmuar në detyrë nga Komisioni i Pavarur i Kualifikimit, shkalla e parë e Vetingut. Të gjitha rekomandimet e OPNM për largimit e 12 gjyqtarëve dhe prokurorëve nga sistemi, janë pranuar nga Komisioneri Publik, i cili i ka kërkuar Kolegjit të Posaçëm të Apelimit, shkallës së dytë dhe të fundit të Vetingut, shkarkimin e tyre nga detyra.
Tre subjektet e fundit të konfirmuar në shkallën e parë të Vetingut dhe që ONM kërkon të largohen nga drejtësia janë gjyqtarja në Gjykatën Administrative të Apelit, Alkelina Gazidedja, kryeprokurorja e Durrësit Anita Jella dhe prokurori Besim Hajdarmataj. ONM ka hartuar një nga dokumentet më kritike për KPK, pas konfirmimit në detyrë të gjyqtares Alkelina Gazidedja. Operacioni Ndërkombëtar i Monitorimit thotë në rekomandimin për gjyqtaren Gazidedja se kjo e fundit duhet të ishte shkarkuar për kriterin e pasurisë si dhe nuk duhej të shpallej e ‘aftë’ në kriterin e aftësive profesionale. Rekomandimi i ONM për gjyqtaren u pranua nga Komisioneri Publik, i cili dy ditë më parë i ka kërkuar Kolegjit të Apelimit shkarkimin nga detyra.
