Një debutim jo ashtu siç pritej për Armando Sadikun, me bomberin kuqezi që ishte titullar në humbjen 2-0 që Levante pësoi ndaj Real Betis. Në “Estadi Ciutat de València” dominimi i miqve ishte i dukshëm që në startin e takimit, por shkëndijën e parë e dha sulmuesi elbasanlli. Pjesa e parë nuk kishte raste të pastra shënimi, ndërsa Sadiku vendosi në provë portierin Adan. Kur po luhej minuta e 10-të, 26 vjeçari i transferuar këtë merkato janari tek skuadra nga Valencia, shkarkoi një të majtë nga jashtë zonës, me topin që u ndal pa shumë vështirësi nga gardiani mik. Fraksioni i dytë ishte katastrofal për Levanten, pasi në minutën e 55-të mbrotjësi Cema ngatërroi shenjestër duke realizuar në portën e tij. Debutimi i Sadikut në La liga zgjati 65 minuta, pasi numri 7-të i la vëndin Giampaolo Pazinit. 4 minuta pas daljes së Sadikut, Sergio Leon realizoi dhe të dytin. Kjo fitore i jep shpresë Betis për një vend në Europë vitin e ardhshëm, ndërsa Levante vazhdon të mbetet shumë afër zonës së ftohtë, pasi gjendet vetëm 1 pikë lart Las Palmas së vendit të 18-të.
