SHBA-ja i mundëson Pakistanit pjesëmarrje në trajnimet ushtarake

0
3

Ky vendim reflekton një përmirësim të marrëdhënieve të tensionuara në mes të të dyja shteteve, pas ngjitjes në pushtet të Imran Khanit. Trump ka mirëpritur kryeministrin pakistanez në Shtëpinë e Bardhë në muajin korrik, derisa Uashingtoni disa herë ka mirëpritur ndihmën e Islamabadit në bisedimet për paqe me talibanët afganë.

Ndihma ushtarake ishte pezulluar para zgjedhjes së Khanit kryeministër në gusht të vitit të kaluar. Në shtator të 2017-ës, Shtetet e Bashkuara kanë njoftuar se planifikojnë të pezullojnë ndihmën ushtarake për Pakistanin, derisa ky shtet të marrë hapa më të mëdhenj për shkatërrimin e atyre që Trump i ka quajtur “streha të sigurta” për grupet militante kundër Afganistanit.

Në total, ndihma ushtarake e pezulluar e SHBA-së për Pakistanin ka vlerën e 2 miliardë dollarëve. Pakistani ka mohuar se strehon terroristë dhe ka thënë se Shtetet e Bashkuara janë duke shfrytëzuar Islamabadin si viktimë për dështimin që kanë përjetuar në luftën gati 18-vjeçare në Afganistan.

Zëdhënësja e Departamentit amerikan të Shtetit ka thënë se pezullimi “ka ndikuar në zvogëlimin e përjashtimeve për programet që mbështesin interesat jetike të SHBA-së”, transmeton rel.

Ajo ka thënë se Uashingtoni “ka miratuar Programin Ndërkombëtar për Edukim Ushtarak dhe Trajnim për Pakistanin, por meqë është përjashtim, ky vendim është subjekt i miratimit nga Kongresi”.

Komitetet e Kongresit që kanë juridiksion në këtë proces, nuk kanë komentuar vendimin e administratës.