Deputeti demokrat Agron Shehaj ka denoncuar faktin se inceneratori i Tiranës deri më tani ka marrë mbi 20 milionë euro nga qeveria e Edi Ramës.
Edhe pse në fakt ky incenerator nuk ekziston, për të paguhet çdo ditë 70 mijë euro nga taksat e shqiptarëve.
Reagimi i plotë i deputetit Agron Shehaj:
Arrestimet e fundit të SPAK për aferën e inceneratorëve, jo vetëm që nuk e venë drejtësinë në vend, por më e rëndësishmja është se nuk e ndalin vjedhjen gjigante.
Inceneratori fantazmë i Tiranës është një aferë korruptive njësoj si ai i Elbasanit dhe i Fierit. Është i njëjti ministër që firmosi koncesionin. Janë të njëjtët njerëz që kanë marrë koncesionin, Zoto dhe Mërtiri. Më e rëndësishmja, janë të njëjtat kompani që janë përdorur për të paguar ryshfete dhe vjedhur paratë e qytetarëve.
Kompania në pronësi të Zotos, aktualisht nën sekuestro nga SPAK, ka marrë 20 milionë euro pagesa si nënkontraktor nga inceneratori i Tiranës.
Gjithashtu, inceneratori fantazmë i Tiranës ka paguar 400 milionë lekë për kompaninë Pivot 04. Është kompania fiktive që SPAK e provoi se ishte përdorur për korrupsion në Fier dhe Elbasan. Kështu janë paguar dhe shumë kompani të tjera fantazmë për të çuar ryshfete tek zyrtarët.
SPAK-u pranon në njoftimin zyrtar se babai i Alqi Bllakos ka qenë i punësuar fiktivisht dhe ka marrë pagesat korruptive nga kompania Integrated Energy, pra kompania që ka koncesionin e Tiranës. Jo në Fier apo Elbasan.
Por pavarësisht gjithë këtyre fakteve të qarta dhe kokëforta, SPAK nuk guxon të sekuestrojë inceneratorin e Tiranës. Kjo është drejtësi me leje. Dhe kjo është të bekosh vjedhjen.
Për çdo ditë që kalon, inceneratori fantazmë i Tiranës u merr qytetarëve shqiptarë 70 mijë euro. Pra 70 mijë euro vjedhje në ditë me bekimin e qeverisë dhe hezitimin e pakuptueshëm të SPAK për të vënë në sekuestro kompaninë.
