Në kulmin e fushatës pompoze “antitërmet” të kësaj qeverie, Kryeministri u largua me urgjencë drejt selisë së OKB në Neë York, ku sipas deklaratës së bërë, do të takonte Presidentin Trump!
Më tej deklaroi që “takimi” u realizua dhe botoi një foto me Presidentin amerikan…Por vetëm kaq, megjithëse çuditërisht u tha që gjithçka do të shpjegohet në vazhdim.Pa asnjë dyshim, një takim i tij me Presidentin Trump do të ishte një ngjarje e shënuar për vendin tonë, për marëdhëniet me këtë partner gjeostrategjik, por edhe për rajonin në tërësi.
Është detyrim i Kryeministrit, zyrës së tij, Ministrisë sonë të Jashtme, të lëshonin menjëherë një njoftim zyrtar për atë takim, të njoftojnë sa zgjati ai, kush ishte prezent aty, ku u bë, thelbin e çështjeve që u diskutuan në atë, etj….nëqoftëse kjo ndodhi!
Kjo praktikë e detyrueshme dhe etike është ndjekur jo vetëm për një të tillë takim të shumë mirëpritur e të rëndësishëm, por edhe për të tjerë; psh një njoftim i tillë zyrtar, megjithëse i cunguar, u bë normalisht edhe për takimin me Kryeministrin e Greqisë.
Fatkeqësisht deri më sot, kur kanë kaluar disa ditë, ka vetëm heshtje të pajustifikuar, që në realitet mund të interpretohet gabimisht edhe si një mosvlerësim i Kryeministrit tonë për atë “takim”!
Ndërsa në listën e Shtëpisë së Bardhë të takimeve të Presidentit Trump në këtë sesion të OKB nuk figuron asnjë takim me Kryeministrin tonë.
Opinioni ynë është në pritje të një sqarimi zyrtar.