Prokuroria e Posaçme Anti-Korrupsion ka marrë në pyetje drejtorin e Teatrit Kombëtar, Hervin Çulin në kuadër të hetimeve për shembjen e godinës së Teatrit.
Mësohet se Çuli është thirrur për të dëshmuar në cilësinë e personit që ka dijeni për çështjen.
Ai është paraqitur në SPAK që në orën 9 dhe ka qëndruar për më shumë se 2 orë në Prokurori.
Prokuroria e Posaçme kundër Korrupsionit dhe Krimit të Organizuar është duke kryer hetime për shpërdorim detyre gjatë procesit të miratimit të vendimit dhe ekzekutimit të tij duke e finalizuar me prishjen e godinës së Teatrit Kombëtar mëngjesin e 17 majit 2020.
Hetimi nisi pas kallëzimit të Aleancës për Mbrojtjen e Teatrit të bërë më 31 dhjetor 2019 dhe 23 janar 2020.
Kallëzimi i bërë nga Partia Demokratike në lidhje me këtë çështje i është bashkuar këtij procedimi penal.
