Ish-deputeti i Partisë Demokratike, Luçiano Boçi, në një intervistë për FaxNews, thotë se edhe në ditën e parë të shkollës qeveria bëri propagandë duke theksuar se asnjë investim të dukshëm nuk ka pasur në fushën e arsimit ku nuk la pa përmendur edhe manipulimin që bëhet sipas tij, me ‘librat falas’ për nxënësit e klasave të para deri në klasën e pestë.
Boçi deklaroi se mësuesit kanë humbur çdo funksion, situata në arsim është përkeqësuar dhe janë përjashtuar nga sistemi mësues me eksperiencë duke punësuar militantë të partisë në pushtet.
“Janë përjashtuar nga sistemi arsimor mësues me përvojë dhe arsimim të kualifikuar dhe janë emëruar të tjerë në bazë të rezultateve politike të cilët shkojnë në fushatatat e kryeministrit, në komisionet zgjedhore etj.
Mësuesi ka humbur çdo funksion dhe sot ndodhet në gjendjen më të keqe në bazë të politikave të ministrisë së Arsimit, ne kemi sjell fakte të vërteta që e provojnë se situata është përkeqësuar. Nëse bëjmë një krahasim me atë që ka ndodhur gjatë këtyre 6 viteve me atë që ka ndodhur në qeverisjen tonë, janë të pakrahasuseshme në tërë sistemin arsimor. Për instalimin e laboratorëve, pasurimin e bibliotekavve, ndërtimit apo rikonstrukturimit të shkollave, dixhitalizimit të tyre etj. Edhe në ditën e parë të shkollës kishte dhe bëhet vetëm propagandë, në shkollat e qyteteve të mëdha ende bëhet mësim me dy turne. Drejtorët e shkollave në shumë raste janë emëruar politikisht dhe jo në bazë të meritokracisë dhe eksperiencës. Janë rritur në mënyrë të ndjeshme çmimet e librave për nxënësit e kjo është diçka absurde, ndërsa nxënësit marrin dije në shkolla të rrënuara. Qeveria ka caktuar në arsim buxhetin më të madh por nuk ka investime.
Me çmimet e kripura bëhet biznes, dhe propaganda bëhet, dhe ndërkohë kanë sfiduar me demek platformën e Partisë Demokratike për dhënien e librave falas. Shteti duhet t’ju përgjigjet qytetarëve me libra falas dhe në vend që të bëjë rrugë me vlerë marramendëse prej 22 mln eurosh, librat falas do të ishin jo vetëm diçka që do të mundësohej kollaj, por edhe për përdorimin e tyre në investime të tjera”, tha Boçi.
Ish-deputeti demokrat foli edhe për klasat me numër të lartë nxënësish dhe klasat me turne ku tha se nuk ka asnjë hap konkret për zgjidhjen e kësaj çështjeje.
“Gjithçka e përdorin për retorikë televizive ndërkohë që arsimi është në një situatë dramatike dhe kjo do të konstatohet në të ardhmen, një të ardhme të cilën të rinjtë sidomos e shohin jashtë Shqipërisë. Po nxjerrim njerëz që veprimtarinë dhe kontributet e tyre shkojnë për vendet e tjera ndërkohë që kjo vjen për shkak të politikave korruptive dhe keq qeverisjes”.
