Studentët protestues, të cilët për të shtatën ditë ndodhen para ministrisë së Arsimit, kanë shfrenuar imagjinatën në pankartat e tyre.
Me thirrje në kor kundër negociatave por gjetjen e zgjidhjeve për 8 kërkesat e tyre, të rinjtë kanë shpalosur me vizatime dhe fjalë në pankarta, konstatime dhe shigjetime të ndryshme.
Në disa prej tyre siç mund të shikoni dhe në fotogaleri shkruhet:
-Z.Kryeministër, na ktheni përgjigje deri në ora 16.00, se kemi kurs gjermanishte në orën 17.00.
-Shkurtoni kostot, jo ëndrrat.
-Kafshatë që s’kapërdihet është or vlla tarifa.
-Çmime evropiane, rroga afrikane, racë arjane, standarde talebane, Shqipëri mjerane.
-Pranoni kërkesat se na çatë Edin.
-Shikoni ndonjë fëmijë politikani në protestë me ne?
-Sistemi var për tarifat.
-Loja ka ndryshuar, ky është qyteti ynë etj
Studentët protestojnë prej 7 ditësh për të drejtat e tyre dhe nuk pranojnë të ulen në bisedime me kryeministrin Edi Rama për kërkesat e parashtruara ndaj qeverisë, ndonëse shefi i ekzekutivit tha se nuk do ketë lëvizje nëse nuk ka bisedime.
