Dhuna në familje e sidomos ndaj grave, e ka bërë Tiranën portokalli, në kuadër të 16 ditëve të aktivizimit kundër saj.
Të premten, pranë Muzeut Kombëtar u zhvillua një aktivitet ndryshe, që solli në vëmendje historitë e suksesit të grave që kanë luftuar dhunën dhe kanë nisur një jetë të re.
Mbështetje të thellë për këto gra dha edhe zëvendës ambasadorja e SHBA-ve, Lejla Moses Ones.
Lejla Moses Ones: SHBA-të ndihen shumë krenare për të qenë pjesë e përpjekjeve ndërkombëtare kundër dhunës ndaj grave. T’i japësh fund dhunës në vendin e punës, mund të sigurosh që gratë të shpalosin potencialin e tyre si drejtuese apo sipërmarrëse. SHBA-të kanë mbështetur nisma që gratë në zonat rurale të jenë më të pavarura ekonomikisht.
Zëvëndës ministrja e Mirëqenies Sociale Bardhylka Kospiri, solli në vëmendje djemtë dhe burrat duke i konsideruar po aq të rëndësishëm në zgjidhjen e këtij problemi.
Kospiri: Shumë vende janë përfshirë në iniciativa që synojnë të angazhojnë burrat dhe djemtë jo si pjesë e problemit por si pjesë e zgjidhjes.
Dhuna me bazë gjinore është një nga shkeljet më të shpeshta të të drejtave të njeriut duke mos njohur kufinj socialë, ekonomikë apo kombëtarë.
