Tragjedi në Vlorë. 4 anëtarë të një familjeje kanë humbur jetën dhe 2 persona të tjerë, kanë mbetur të plagosur si pasojë e një aksidenti të rëndë rrugor, të ndodhur rreth një orë më parë në autostradën e Vlorës.
Një familje që udhëtonte me një mjet tip Toyota është shuar e gjitha, dy bashkëshortët dhe dy fëmijët e tyre kanë ndërruar jetë, shkruan newsbomb.al. Ata kanë qenë duke udhëtuar me drejtim Vlorën, kur një mjet tip Audi i zi, me shpejtësi “skëterrë” i ka marrë përpara.
Nga përplasja e fuqishme, mjeti Toyota është shkatërruar i gjithi, ndërsa vetë Audi, ka dalë nga rruga dhe ka ecur për dhjetra metra, ka thyer një shtyllë elektrike dhe ka përfunduar në kanal. Shpejtësia e lartë dyshohet se ka qenë shkak i aksidentit. Aq e fuqishëm ka qenë duke lëvizur mjeti tip Audi, ku të plagosur kanë mbetur shoferi dhe pasagjeri, saqë kur ka rënë në kanal, ka hapur një gropë të madhe në tokë. Forca të shumta policie, kalimtarë të rastit dhe forcat zjarrfikëse, ndodhen në vendngjarje.
Një prej bashkëshortëve që ndodhej në mjetin tip Toyota, është transportuar në spital bashkë me vajzën e mitur, por fatkeqësisht, të dy kanë ndërruar jetë. Ndërkohë, dy anëtarët e tjerë të familjes, kanë ndërruar jetë në vendngjarje. Në spital aktualisht, ndodhen vetëm pasagjeri dhe shoferi i Audit, pasi janë plagosur.
