Tre të rinj kanë shkuar në spitalin e Vlorës të plagosur me thikë.
Mësohet të rinjtë e plagosur janë 20-vjeçari Xhuliano Hodaj, 18-vjeçari Enea Tafili dhe një tjetër 18-vjeçar me iniciale N. H.
Policia bën me dije se ka arrestuar një nga autorët dhe tjetrin e ka shpallur në kërkim.
Plagosja e tyre ka ardhur si pasojë e një sherri për motive të dobëta, megjithatë ka nisur puna për zbardhjen e rrethanave të kësaj ngjarjeje.
Njoftimi i policisë:
Vlorë/Informacion paraprak
Plagosën me mjet prerës (thikë), 3 bashkëmoshtarët e tyre, falë ndërhyrjes së menjëhershme të Policisë, vihet në pranga njëri prej autorëve të dyshuar, punohet për kapjen e autorit tjetër të dyshuar.
Sekuestrohen 1 pistoletë sportive, 2 mjete prerëse (thika) dhe 2 përforcues grushti.
Rreth orës 12:30, në lagjen “Isa Boletini”, dyshohet se pas një konflikti për motive të dobëta, kanë mbetur të dëmtuar me mjet prerës (thikë), shtetasit Xh. H., 20 vjeç, E. T., 18 vjeç dhe H. N., 18 vjeç, të cilët ndodhen në spital, në kujdesin e mjekëve.
Shërbimet e Policisë kanë shkuar menjëherë në vendngjarje dhe falë veprimeve të shpejta, bënë të mundur kapjen e njërit prej autorëve të dyshuar, shtetasit H. M., 18 vjeç, dhe shoqërimin e tij, në Komisariatin e Vlorës, për veprime të mëtejshme procedurale.
Në vijim të veprimeve procedurale, gjatë kontrollit në banesën e shtetasit H. M., shërbimet e Policisë gjetën dhe sekuestruan 1 pistoletë sportive, 2 përforcues grushti dhe 2 mjete prerëse (thika).
Vijon puna për kapjen e autorit tjetër të përfshirë në këtë konflikt, shtetasit J. R.
Ndërkohë, vijon puna e grupit hetimor, për sqarimin e plotë të rrethanave të ngjarjes.
