“Kriteret për Presidentin i vendos Kushtetuta! Të tjerat janë fjalë boshe të nxitura nga Rama, si “gjethe fiku” për komedinë e tij.”
Nga Tritan Shehu.
Nuk kam dëgjuar në asnjë vend të botës demokratike të flitet për “kritere” presidenciale, përveç atyre që parashikon Kushtetuta, ndonjë ligji të veçantë dhe mbështetjes me vota në parlament.
Të përdorësh të tilla truke thjesht për t’u faktorizuar apo edhe më keq për t’i shërbyer Ramës në lojën e tij, është e pafalshme për një deputet, “opozitar”, aq më shumë për një deputet-jurist.
Në fakt janë pikërisht këto kritere të vendosura kuturu e të sforcuara, që zhvlerësojnë të gjithë procesin, i cili në seriozitetin e tij do të bazohej në dy elemente: Kushtetutën dhe votën e deputetëve. Të tjerat jo vetëm e shkatërrojnë atë, por dhe e vizatojnë Presidentin e ardhshëm si një kukull qesharake.
Edhe diçka në fund: unë nuk jam kundër takimeve e kontakteve në politikë, ky ka qenë një parimi im stabël edhe në çastet më të vështira të përplasjeve dhe as i jam shmangur atyre.
Por nuk mund të mos më lërë një shije të keqe një dukuri:
Edhe plas që të takohesh me kundërshtarin politik duke deklaruar që ke gjetur “vezën e Kolombit” për të zgjedhur Presidentin nëpërmjet disa “kritereve“ të denja veçse për drejtues NGO të Ramës…dhe më tej, mbasi e josh atë, stepesh ta takosh, kërkon “jallan shahit“, publik, kolegë të tjerë a media për ato, sikur Balla të jetë ndonjë vampir!
Ndoshta kjo vjen nga kompleksi i fajit për bërjen pjesë të këtij dueti me Ballën, që në fakt vetëm po të përdor! Së paku ta realizonte këtë me Ramën, me pak guxim më shumë, por dhe me benefite më shumë!
