Gjykata e Vlorës ka dhënë masën e sigurisë “arrest shtëpie” për Edison Begaj, i cili u arrestua pak ditë më parë nga forcat RENEA.
Begaj u arrestua gjatë një operacioni policor në Vlorë, ku edhe iu gjet një armë zjarri pa leje, për të cilën familjarët pohuan se ai e mbante, pasi ndihej i frikësuar pas atentatit që iu bë pranë banesës.
Seanca për caktimin e masës së sigurisë u mbajt në spital, pasi 38 vjeçari Begaj u shtrua për shkak të plagëve të marra në atentatin që iu bë pak javë më parë.
Kujtojmë se Begaj u plagos me 4 plumba në një atentat në hyrje të banesës së tij, në fshatin Kaninë nga një person i cili ishte kamufluar si polic.
Ngjarja s’është zbardhur ende, ndërsa pistat e hetimit janë ajo e prishjes së pazareve të drogës ose një konflikt që mund të ketë pasur së fundmi 38 vjeçari Begaj.
