Ministria e Mbrojtjes së Rusisë tha se ka tërhequr trupat nga qyteti strategjik i Limanit, që gjendet në lindje të Ukrainës.
“Për shkak të kërcënimit nga rrethimi, trupat janë tërhequr nga Krasni Liman, në një pozicion më të mirë”, tha Ministria e Mbrojtjes, sipas mediave shtetërore ruse.
Krasni Liman është një emërtim i vjetër sovjetik për Limanin, në të cilin forcat ukrainase thanë se kanë hyrë.
Ushtria ukrainase tha se ka marrë territor në qytetin e Limanit, duke e cilësuar si “sukses të konsiderueshëm”.
Më herët gjatë 1 tetorit, një zëdhënës i forcave ukrainase tha se mijëra trupa ruse janë rrethuar në Liman.
“Grupi rus në Liman është rrethuar”, tha zëdhënësi Serhiy Cherevatiy. “Vendbanimet në Jampil, Novoselivka, Shandriholov, Drobishev dhe Stavki janë çliruar dhe po ndërmerren masa për stabilizimin e situatës”, shtoi ai.
Cherevatiy vlerësoi se numri i trupave ruse që janë rrethuar është afër 5.000, dhe shtoi se forcat ruse po tentojnë që ta thyejnë rrethimin.
Rimarrja e Limanit nga Kievi, paraqet humbje të madhe për ushtrinë ruse që nga nisja e kundërofensivës ukrainase muajin e kaluar, që ka dëbuar forcat e Moskës nga rajoni i Harkivit.
Cherevatiy shtoi se çlirimi i Limanit do të mundësonte që forcat ukrainase të hyjnë në rajonin e Luhanskut “drejt Kreminës dhe Severodonjeckut”.
Një lëvizje e tillë do të turpëronte edhe më shumë Kremlinin, që në korrik tha se rajoni i Luhanskut është i pushtuar plotësisht.
Presidenti rus, Vladimir Putin, më 30 shtator paligjshëm aneksoi katër rajonet pjesërisht të okupuara ukrainase: Luhansk, Donjeck, Herson dhe Zaporizhja. Putin tha se këto tani janë territore ruse, teksa Perëndimi tha se një vendim i tillë përbën një përshkallëzim të luftës.
Të katër këto rajone, së bashku me Krimenë – që Moska aneksoi më 2014 – përbëjnë rreth 20 për qind të territorit të Ukrainës dhe në to përfshihen disa prej zonave më të industrializuara.
Kievi ka thënë se nuk do të negociojë me Moskën për aq kohë sa Putin është në pushtet./REL
