Një ngjarje e pazakontë ka ndodhur në Itali. Një turist francez u gjobit me 1,000 euro, pasi u përpoq të largohej nga Sardenja me më shumë se 1.8 kilogram rërë në bagazhet e tij.
Sipas CNN, rëra e bardhë e ishullit italian është e mbrojtur me ligj ndërsa turistët mund të përballen me gjoba dhe madje me burg për marrjen e saj nga plazhet lokale.
Burri i cili nuk u identikua me emër, u kap në Aeroportin e Cagliari Elmas, më 1 shtator pasi vodhi rërë të cilën e kishte vendosur në një shishe.
“Shishja u konfiskua dhe tani është në sallën tonë të operacionit, ku ne i mbajmë këto sende të konfiskuara. Në fund të vitit zakonisht kemi shumë shishe rërë të grumbulluara” u shpreh një zëdhënës për CNN.
Ndërkohë, në vitin 2017 u prezantua një ligj rajonal i cili e bëri të paligjshme marrjen e rërës nga plazhet e Sardenjës në Itali.
“Ligjet u vendosën sepse incidentet po bëheshin gjithnjë e më të shpeshta. Plazhet me rërë me ngjyrë ” të pabesueshme “, rozë ose shumë të bardhë janë veçanërisht të shënjestruara”, shtoi zëdhënësi.
