Ish-ministri i Brendshëm, Fatmir Xhafaj ka thyer heshtjen që pas dorëheqjes së dhënë javë më parë.
Këtë e ka bërë përmes një postimi në Twitter lidhur me mbledhjen e Gjyqtarëve dhe Prokurorëve që do të zgjedhë anëtarët institucioneve të reja të drejtësisë.
Ish-Ministri Xhafaj e ka cilësuar këtë një hap kyç i reformës në sistemin e Drejtësisë.
Sipas Xhafajt, shumë shpejt do të ngrihen institucionet e drejtësisë, prej të cilave nuk do të shpëtojë askush që ka kryer korrupsion.
“SOT e NESËR hapa kyç për reformën në drejtësi. Mbledhjet e prokurorëve&gjyqtarëve do të zgjedhin anëtarët e KLP&KLGJ. Nëse Vettingu i gjyqtarëve e prokurorëve synon mbylljen e një kapitulli të errët, krijimi i KLGJ&KLP është hapi i parë e themelor për ngritjen e sitemit të ri
Gjyqtarët e prokurorët me transparencë e përgjegjësi qytetare, zotësi profesionale e vlera morale do të jenë kontribues të procesit, pa mëdyshje. Është përgjegjësi për konsolidimin e shtetit të së drejtës, interesin e qytetarëve, ngritja sa më shpejt e funksionimi i KLGJ&KLP
Shumë shpejt KLGJ dhe KLP do të ngrihen për t’i dhënë udhë procesit reformues të institucioneve, për t’u dhënë atyre pavarësinë, përgjegjshmërinë, funksionalitetin dhe eficensën e munguar.
Reforma në drejtësi nuk mund të ndalet më nga askush. Ajo është jetike për të ardhmen e vendit, për demokracinë e shtetin e së drejtës, luftën kundër krimit të organizuar, korrupsionit e pandëshkueshmërisë”, thekson Xhafaj.
