Ambasadorja e SHBA-së, Yuri Kim, ditën e sotme u është bashkuar ish-të përndjekurve politikë dhe të afërmve të tyre për inagurimin e ekspozitë së jashtme të përhershme në ish-kampin e internimit në Tepelenë.
Përmes një postimi në rrjetet sociale, Yuri Kim shkruan se ky kamp ka mbajtur mbi 3000 njerëz, në kushte të tmerrshme, ku vetëm gjatë dy muajve në vitin 1950 humbën jetën nga sëmundjet 285 fëmijë.
E prekur nga historia e një prej të internuarve, Yuri Kim u ka bërë thirrje autoriteteve shqiptarë që të vazhdojnë të mbledhin dhe të publikojnë dokumente dhe të dhëna në lidhje me këtë pjesë të dhimbshme të historisë së Shqipërisë.
Postimi i plotë i Yuri Kim:
Isha e nderuar t’iu bashkohesha ish-të përndjekurve politikë dhe të afërmve të tyre për inaugurimin e ekspozitës së jashtme të përhershme në ish-kampin e internimit në Tepelenë.
Gjatë funksionimit të tij në vitet 1949-1953, kampi i Tepelenës mbajti mbi 3000 njerëz, në kushte të tmerrshme. Vetëm gjatë dy muajve në vitin 1950, vdiqën nga sëmundjet 285 fëmijë. U preka kur dëgjova Simon Mirakajn, i cili u detyrua të jetonte atje nga mosha katër deri në nëntë vjeç, të fliste për atë që ai dhe të tjerët duruan në kamp.
Është shumë e rëndësishme që autoritetet shqiptare të vazhdojnë të mbledhin dhe të publikojnë dokumente dhe të dhëna në lidhje me këtë pjesë të dhimbshme të historisë së Shqipërisë. Njerëzit vazhdojnë të vuajnë, veçanërisht ata që nuk kanë gjetur ende eshtrat e të dashurve të tyre. Paqja nuk mund të vijë pa të vërtetën dhe pajtimin.
