Komisioneri Shtetëror i Zgjedhjeve, Ilirjan Celibashi i rikujton kryetarëve të njësive të qeverisjes vendore ku do të zhvillohen zgjedhjet lokale në 6 Mars, detyrimin që kanë për të lajmëruar me shkrim zgjedhësit e përfshirë në listën e shpallur nga zyrat e gjendjes civile për qendrat e votimit.
Sipas tij, lajmërimi me shkrim duhet të përmbajë informacion mbi qendrën e votimit, vendndodhjen dhe adresën e saj, si dhe numrin rendor të zgjedhësit në listën e zgjedhësve të qendrës së tij të votimit.
KQZ iu bën thirrje qytetarëve të bashkisë Dibër, Shkodër, Durrës, Vorë, Rrogozhinë dhe Lushnjë, të kontrollojnë emrin e tyre në listën e zgjedhësve dhe vendndodhjen e qendrës së tyre të votimit pranë njësive të tyre administrative, si edhe në faqen zyrtare të KQZ-së.
Kujtojmë se zgjedhjet e pjesshme do të mbahen më 6 Mars, në 6 bashki të vendit, ku qytetarët do të votojnë për kryetarin e Bashkisë së tyre:
-Bashkia e Durrësit
-Bashkia e Shkodrës
-Bashkia e Dibrës
-Bashkia e Vorës,
-Bashkia e Lushnjës
-Bashkia e Rrogozhinës
