Cilësia e ajrit në kryeqytetin Nju-Delhi të Indisë është përkeqësuar së tepërmi në javët e fundit. Autoritetet mendojnë se mund të përmirësojnë disi situatën duke alternatuar qarkullimin ditor të makinave private sipas targave.
Në kryeqytetin indian do të kufizohet qarkullimi i automjeteve në përpjekjen për të ulur nivelet e rrezikshme të ndotjes.
Makinat me targat tek dhe çift do të mund të lëvizin në Nju-Delhi me alternime deri në datën 15 nëntor.
Matjet në kryeqytet tregojnë se niveli i grimcave të rrezikshme e kalon normën standarde, duke u bërë kërcënim për zhvillimin e sëmundjeve të zemrës dhe mushkërive por edhe për vdekjen e parakohshme të të moshuarve.
Retë e smogut janë përkeqësuar nga zonat rurale që lirojnë fushat duke djegur barërat e këqija.
Rol luajnë edhe industritë e rënda dhe ndërtimet.
“Nuk mund ta ulim që sot smogun e shkaktuar nga djegiet sepse është shpërndarë tashmë, por të paktën mund të reduktojmë burimet e ndotjes brenda qytetit, për veten dhe fëmijët tanë,” deklaroi të hënën zëvendësministri i Delhit.
Masa është mirëpritur nga banorët, ndërsa të painformuarit janë përballur me gjoba mbi 50 dollarë.
“Nuk e dija që rregulli tek-çift zbatohej sot. Mbërrita mbrëmë për ca punë dhe po kthehesha në shtëpi. Kur pashë posterin u mundova të shmangesha me shpejtësi por më kapën,” shprehet një qytetar.
Autoritetet u kanë bërë thirrje banorëve në kryeqytet të qëndrojnë brenda banesave dhe të mos kryejnë ushtrime fizike, ndërsa shkollat do të qëndrojnë mbyllur edhe të martën.
