Ish-zëvendësministri i Financave, Sherefedin Shehu, ka reaguar me tone të ashpra ndaj kryeministrit Edi Rama, në lidhje me dhuratat që ka bërë në disa familje në nevojë për festat e fundvitit.
Me anë të një statusi në rrjetet sociale, Shehu thotë se Rama u kujtua për t’i dhënë një kockë të vogël të varfërve në fund të vitit. Ai i numëron Ramës të gjitha ndryshimet që ka pësuar ekonomia e shqiptarëve me PS-në në pushtet, që nga rritja e çmimit të energjisë e deri te borxhi publik.
“Ditën e fundit të vitit z. Rama u kujtua t’ju hedhë një kockë edhe të varfërve.
Rama gjithë vitin ushqen klientët e vet dhe ditën e fundit të vitit kujtohet që të hedhë një kockë edhe për të varfërit.
Ai që sot bën heroin dhe zemërgjërin në 2014 hoqi fashën e energjisë prej 300 Kw/orë dhe këta 1 milionët e varfër sot paguajnë 23 përqind më shumë për çdo Kw/orë.
Ky zemërgjëri i sotëm në 2 vjet pandemi dha vetëm 150 milion euro kur Mali i Zi që është sa ¼ e Shqipërisë dha 10 herë më shmë dhe vendet e tjera të Ballkanit 2-5 herë më shumë se Shqipëria. Edhe këtë mbështetje e dha duke rritur borxhin publik me 16% të PBB.
Ky heroi i sotëm buxhetoi për këtë vit një paketë për tu tallur që e quajti të rezistencës, por edhe ajo nuk u harxhua dhe e rishpërndau me aktin e parafundit normativ të buxhetit.
Ky që del dhe hiqet si hero sot e ka bërë Shqipërinë vendin me pagën më të ulët dhe me varfërinë më të madhe në Europë. Shqipëria ka 31% të popullsisë të varfër ndërsa Kosova 21% dhe vendet e tjera të Ballkanit 17%.
Ky heroi i sotëm po i merr frymën ekonomisë me koncesione të cilat kanë rritur në 50% te PBB nga 33% që i kishte në 2018.
Për këtë trimin e sotëm raportet e FMN-së dhe partnerëve të tjerë thonë se “Korrrupsioni qeveritar po mban peng rritjen ekonomike.”
Dhe sot në ditën e fundit z. Rama del për të bërë lajm të madh një kockë të vogël. Dhe kjo është vërtet kockë se edhe po të jetë aq sa thotë ai ajo është vetëm 8 mijë lekë për familje pas 10 vitesh në pushtet.
Por, edhe këtë kockë që e miraton sivjet do ta japë mot. Por edhe për mot nuk është e sigurtë sepse këto para do t’i përlajnë drejtoreshat mashtruese dhe kontrabandiste, drejtorët trafikantë dhe patronazhistët para se të mbërrijnë tek të varfërit.
Dhe në fund për këtë duhet të hetojë edhe SPAK-u sepse ligji i buxhetit nuk lejon që paratë e këtij viti të trashëgohen në vitin tjetër dhe e dënon krijimin e xhepave jashtë buxhetit.
Apo ky pyet Rama dhe SPAK-u për ligj”, shkruan ish-zv.ministri.
