Ambasada e SHBA në Tiranë ka dhënë një mesazh për SPAK-un, duke marrë shkas nga operacionet e zhvilluara nga kjo e fundit.
Ambasada thotë se SPAK po bën përparim mbresëlënës në objektivat e Shqipërisë për reformën në drejtësi.
Në deklaratë thuhet se puna e Strukturës së Posaçme dhe e institucioneve të tjera të drejtësisë kërkon guxim, integritet dhe pasion të jashtëzakonshëm.
Ky mesazh vjen pas takimit që zhvilloi kreu i SPAK, Altin Dumani me përfaqësues të ambasadës amerikane.
Ambasada e SHBA, mesazh për SPAK:
“SPAK po bën përparim mbresëlënës në objektivat e Shqipërisë për reformën në drejtësi. Sot, i Ngarkuari me Punë David Wisner dhe kolegët e Ambasadës së SHBA-së që mbështesin sektorin e drejtësisë u takuan me Kryeprokurorin e Posaçëm të SPAK-ut Altin Dumani, prokurorët e SPAK-ut dhe hetuesit e NBI-së që po punojnë për të çrrënjosur krimin e organizuar dhe korrupsionin në Shqipëri. Puna e SPAK dhe të tjerëve në sektorin e drejtësisë kërkon guxim, integritet dhe pasion të jashtëzakonshëm. Z. Wisner përcolli vlerësimin e Shteteve të Bashkuara për punën e SPAK, duke theksuar se ai ka mbështetjen tonë të plotë për të kryer misionin e tij në emër të popullit shqiptar”, thuhet në deklaratë.
